Dil-E-Be-Qarar Chala to Tha Gila-E-Hayat Liye Hue

dil-e-be-qarar chala to tha gila-e-hayat liye hue

gham-e-ishq ruuh pe chha gaya gham-e-ka.enat liye hue

kabhi be-irada chhalak ga.i thi kisi ke zikr pe chashm-e-nam

vo hain mujh se aaj bhi bad-guman vahi ek baat liye hue

mire dil ke saath hi chhin le miri ḳhud-shanas nigah bhi

main tire qarib na a.unga ye tavahhumat liye hue

kabhi tujh pe apna guman hai kabhi ḳhud pe tera guman hai

mire kirdgar kahan rahun ye tasavvurat liye hue

shab-e-intizar ke ba.ad phir na hui tulu koi sahar

miri umr saari guzar ga.i yahi ek raat liye hue

tujhe naz-e-zabt baja sahi magar ai ‘faridi’-e-sada-dil

koi chashm-e-sho.ala-mizaj hai tire dil ki baat liye hue