Ilzam Ek Ye Bhi Utha Lena Chahiye

ilzam ek ye bhi utha lena chahiye

is shahr-e-be-aman ko bacha lena chahiye

ye zindagi ki aḳhiri shab hi na ho kahin

jo so gae hain un ko jaga lena chahiye

vo kis taraf chala hai lagae koi suragh

main kis taraf ravan huun pata lena chahiye

yaani qimar-e-ishq men kya kuchh hai daav par

is raz-e-va-shagaf ko pa lena chahiye

kaisa hai kaun ye to nazar aa sake kahin

parda ye darmiyan se hata lena chahiye

dil par jo yadgar rahe us ke makr ki

aisa bhi koi naqsh bana lena chahiye

is tarah bhi chala hai kabhi karobar-e-shauq

ruthe koi to us ko mana lena chahiye

kijiye na kyuun mutalba-e-vasl ai ‘zafar’

ki hai vafa to is ka sila lena chahiye

Leave a Comment