Kashfi Lucknavi
is daur men sab apna chalan bhuul ga.e hain
had ye hai ki fankar bhi fan bhuul ga.e hain
sayyad suna.en tujhe kyunkar vahi naghme
ham lahja-e-arbab-e-chaman bhuul ga.e hain
hai apni jagah aaj bhi har rasm-e-zamana
lekin hamin a.in-e-vatan bhuul ga.e hain
manzil ke nishan mar ke bhi vo pa na sakenge
jo log rah-e-dar-o-rasan bhuul ga.e hain
afsos mila hai unhen kab izn-e-riha.i
jab ahl-e-qafas rah-e-chaman bhuul ga.e hain
kis tarah shikayat karen be-tabi-e-dil ki
kya ham tire mathe ki shikan bhuul ga.e hain
pursan nahin ghurbat men mira koi bhi ‘kashfi’
shayad mujhe yaran-e-vatan bhuul ga.e hain
Leave a Reply