Rehman Musawwir
yuun aane vaale akele-pan ke liye main yaden bana raha huun
ki us ke nazdik baiTh kar kuchh fuzul baten bana raha huun
udaas mausam udaas jhule udaas phirte hain sab parinde
so un ki ḳhatir main bazuon se shajar men shaḳhen bana raha huun
main janta huun vo ḳhud-gharaz hai par is tabi.at ka koi hal hai
vo mere din ḳhaak kar raha hai main us ki raten bana raha huun
mujhe ḳhud apne badan se kirnen nikalti mahsus ho rahi hain
main canvas par hasin laḌki ki shoḳh ankhen bana raha huun
kaman aabru siyah palken gulab aariz ghazal ankhen
hai jin se vabasta ishq mera vo saari yaden bana raha huun
Leave a Reply