Ki Tere Shahr Se Aati saDak Se Munsalik Hain

Poet

ki tere shahr se aati saḌak se munsalik hain

miri ḳhushiyan tire gham ki kumak se munsalik hain

hamari baat men kuchh vazn ho to kis tarah ho

ki ham to ghair ke nan-o-namak se munsalik hain

use dekhun to phir mujh ko dikha.i de zara kuchh

miri ankhen un ankhon ki chamak se munsalik hain

tire maazi se to gahra ta.alluq hai hamara

sitam ye hai ki tere aaj tak se munsalik hain

zaminen aap apne taur kar saktin nahin kuchh

zaminon ke vasa.il sab falak se munsalik hain

hamari ruuh ki balidgi ke silsile sab

tumhare husn ki taaza mahak se munsalik hain

dilon ke darmiyan ye duriyan kam hon to kaise

zamana ho gaya ham log shak se munsalik hain

tar-o-taza hamesha is liye rahte hain ‘nami’

pahaḌi silsile ab-e-ḳhunak se munsalik hain