ghunche ne taaj gul ne kiya pairahan durust
shadi bahar ki hai hua hai chaman durust
paigham-e-rustaḳhez hai aamad bahar ki
mar kar hui hai nargis-e-bimar tandurust
rakkha dahan-e-tang ne matlab ko na-tamam
nikla tumhare munh se na koi suḳhan durust
gul jalva-gar hain amad-e-fasl-e-bahar hai
kar baghban nasheb-o-faraz-e-chaman durust
paivand-e-mehr-o-mah lagata hai roz-o-shab
karta hai charḳh-e-pir rida-e-kuhan durust
dast-e-junun ne qaid-e-taalluq se di najat
pahuncha na ek ta-ba-gulu pairahan durust
karti hai jama bad-e-saba ḳhaak muntashir
hota hai phir nishan-e-mazar-e-kuhan durust
hoti hain josh-e-ishq men jo jo shikayaten
kahta hai naaz se vo but-e-sim-tan durust
farhad ne fareb-e-mohabbat men jaan di
samjha ki hai muamala-e-pir-zan durust
saaqi bhala ho ḳhair subu koi jaam de
rakkhe ḳhuda hamesha tiri anjuman durust
nahaq ḳharash zaḳhm ki deta hai zinaten
karta hai shana zulf-e-but-e-sim-tan durust
kis rashk-e-gul ki shohrat-e-nazzargi hai aaj
karte hain ghuncha-ha-e-chaman pairahan durust
zang-e-dui se aina-e-dil hai pak-o-saf
rahta hai apna gosha-e-bait-ul-huzan durust
be-faeda hain charagaron ki mashaqqaten
hote nahin hain ishq ke bimar-tan durust
chata hai ek umr luab-e-zaban-e-tegh
zaḳhmon ke muddaton men hue hain dahan durust
badlun radif aur ki ji bhar gaya ‘nasim’
ho aur tarah zulf-e-urus-e-suḳhan durust