KHud Ko Kitni Der Manana paDta Hai

ḳhud ko kitnī der manānā paḌtā hai

lafzoñ ko jab rañg lagānā paḌtā hai

choTī tak pahuñchī rāhoñ se sīkho bhī

kaise parvat kaaT ke aanā paḌtā hai

bachchoñ kī muskān bahut hī mahñgī hai

do do paise roz bachānā paḌtā hai

sach kā kapḌā phuul se halkā hotā hai

jhuuT kā parvat laad ke jaanā paḌtā hai

sūraj ko gaalī dene kā fashion hai

chhāñv kī ḳhātir peḌ lagānā paḌtā hai

dil kā kyā hai jo kah do sun letā hai

āñkhoñ ko aksar samjhānā paḌtā hai

Leave a Comment