Imtiyaz Khan
kakul-o-chashm-o-lab-o-ruḳhsar ki baten karo
zulmat-e-dauran men husn-e-yar ki baten karo
kaun kyuun le kar chala aata hai un ka qafila
anso.on ke qafila-e-salar ki baten karo
koi chahe ya na chahe ye safar hai na-guzir
karvan-e-vaqt ki raftar ki baten karo
ḳhanjaro kuchh to sar-e-maqtal pe ho.e tabsira
ariyo kaaTe ga.e ashjar ki baten karo
kya nahin mumkin ki ho halat pahle ki tarah
kya zaruri hai ki tum pindar ki baten karo
va.izo ab ke sharab-e-ishq par taqrir ho
mai-kashon allah ke didar ki baten karo
be-qarari ka sabab banne lagi danishvari
ab sukun darkar hai be-kar ki baten karo
Leave a Reply