ai yaqinon ke ḳhuda shahr-e-guman kis ka hai
nuur tera hai charaghon men dhuan kis ka hai
kya ye mausam tire qanun ke paband nahin
mausam-e-gul men ye dastur-e-ḳhizan kis ka hai
raakh ke shahr men ek ek se main puchhta huun
ye jo mahfuz hai ab tak ye makan kis ka hai
mere mathe pe to ye daagh nahin tha pahle
aaj a.ine men ubhra jo nishan kis ka hai
vahi tapta hua sahra vahi sukhe hue honT
faisla kaun kare ab-e-ravan kis ka hai
chand rishton ke khilaune hain jo ham khelte hain
varna sab jante hain kaun yahan kis ka hai
Leave a Reply