Poet
char-su shahr men maqtal ka saman hai ab ke
apne saa.e pe bhi qatil ka guman hai ab ke
jo kabhi shahr men ḳhurshid-ba-kaf bharta tha
koi batla.e ki vo shaḳhs kahan hai ab ke
kahkashan lafzon ki honTon pe bikharne diije
duur tak zehn ki galiyon men dhuan hai ab ke
log ankhon men na.e ḳhvab liye phirte hain
kuchh na hone pe bhi hone ka guman hai ab ke
mere maazi ne mujhe yaad kiya hai shayad
ik ḳhalish hai ki qarib-e-rag-e-jan hai ab ke
vaqt kya vaqt se ummid-e-karam kya ‘ḳhusrav’
vaqt halat ka ḳhud marsiyan-ḳhvan hai ab ke
Leave a Reply