aage jo hoga vo hoga ḳhair kar aaya huun main
jo zabar bante the un ko zer kar aaya huun main
haan bahut mushkil to hai lekin ye na-mumkin nahin
dard ki tughyaniyon men tair kar aaya huun main
mar gaya hai koi mujh men us pe miTTi Daliye
apni saari ḳhvahishon ko Dher kar aaya huun main
dard vahshat ranj-o-gham tanha.iyan sham-e-alam
jo mujhe ghere thiin un ko gher kar aaya huun main
vo jise paane ki hasrat dil men muddat se rahi
us ke hi ḳhatir use ab ghair kar aaya huun main
kaam ye asan nahin is men kaleja chahiye
ishq ki vaadi se haan ruḳh pher kar aaya huun main
jaane kis ki diid ki hasrat liye dil men ‘shahab’
dasht-o-sahra se bhi aage sair kar aaya huun main
Leave a Reply