Poet
haath ḳhali sar-e-bazar liye phirti hai
ruuh men sainkaḌon azar liye phirti hai
be-ḳhabar hai ki nahin haath men phuTi-kauḌi
maan jise god men bimar liye phirti hai
ek doshiza numa.ish ka sahara le kar
kitne be-shakl ḳharidar liye phirti hai
noch kar apni haya oḌh ke chehre pe fareb
ek gumrah sa kirdar liye phirti hai
hasrat-o-yas ko laḌiyon men piro kar buḌhiya
mere bachpan se vahi haar liye phirti hai
khul gaya raaz sitare hain baghavat ke nishan
raat kyuun ḳhauf ke asar liye phirti hai
zabt sheva hai ba-har-hal hamara varna
har zaban nok pe talvar liye phirti hai
Leave a Reply