jo shajar suukh gaya hai vo hara kaise ho
main payambar to nahin mera kaha kaise ho
dil ke har zarre pe hai naqsh mohabbat us ki
nuur ankhon ka hai ankhon se juda kaise ho
jis ko jaana hi nahin us ko ḳhuda kyuun manen
aur jise jaan chuke hain vo ḳhuda kaise ho
umr saari to andhere men nahin kaT sakti
ham agar dil na jala.en to ziya kaise ho
jis se do roz bhi khul kar na mulaqat hui
muddaton ba.ad mile bhi to gila kaise ho
duur se dekh ke main ne use pahchan liya
us ne itna bhi nahin mujh se kaha kaise ho
vo bhi ik daur tha jab main ne tujhe chaha tha
dil ka darvaza hai har vaqt khula kaise ho
jab koi dad-e-vafa chahne vaala na raha
kaun insaf kare hashr bapa kaise ho
aa.ine men bhi nazar aati hai surat teri
koi maqsud-e-nazar tere siva kaise ho
kin nigahon se use dekh raha huun ‘shahzad’
mujh ko ma.alum nahin us ko pata kaise ho
Leave a Reply