puura na shab-e-gham ka kabhi silsila hua
vaqt-e-sahar uTha main dua mangta hua
har har nafas men lafz-e-mohabbat zaban pe hai
mujh men na jaane kaun hai ye bolta hua
paaya nahin kisi ne bhi ye raz-e-ka.enat
ek shaḳhs kho gaya hai ḳhuda DhunDhta hua
us se chhupa na pa.ega tu apna hal-e-dil
ankhon ka a.ina hai abhi bolta hua
bimar tha to puchhne aa.e nahin mizaj
mayyat pe aaj us ki hai mela laga hua
kal chaudhvin ki raat bhi ‘arpit’ tamam raat
bhaTka huun apne aap ko main DhunDhta hua
Leave a Reply