kahen kya ki kya kya sitam dekhte hain
likha hai jo qismat men ham dekhte hain
kabhi aah na.ara kabhi khinchte hain
ham is saaz ka zer-o-bam dekhte hain
ḳhat-e-sar-navisht apna ham paḌh rahe hain
tumhara jo naqsh-e-qadam dekhte hain
mire ru-ba-ru vo baham ghair se hain
na dekhe koi jo ki ham dekhte hain
rahi gar talash-e-kamar yuun hi ham ko
koi dam men mulk-e-adam dekhte hain
hazaron guman dil men hote hain paida
tire haath men jab qalam dekhte hain
nahin jaana kis din tu ghairon ke ghar par
sarihan to ankhon se ham dekhte hain
nahin aarzu kuchh bhi bose ki ham ko
magar ham tumhara karam dekhte hain
jo aalam ki dekha hai ku-e-butan men
ḳhuda ki ḳhuda.i men kam dekhte hain
nazar aate ho ‘sehr’ ashiq kisi par
tumhen har ghaḌi chashm-e-nam dekhte hain
Leave a Reply