Husn Par Zeba Nahin Ye Lan-Tarani Aap Ki

husn par zeba nahin ye lan-tarani aap ki

chaar din ki chandni hai naujavani aap ki

ham bhi kuchh munh se jo kah baithen to phir kitni rahe

dekhiye achchhi nahin ye bad-zabani aap ki

kuchh samajh men haal ye aata nahin hairan huun

aaj hai kaisi ye mujh par mehrbani aap ki

baaz aae ham ye apna-ap chhalla lijiye

har kisi ke haath men hai ab nishani aap ki

raah men bhi dekh kar munh pher lete hain huzur

aaj kal hai kis qadar na-mehrbani aap ki

do ghadi ik rang par qaaem nahin husn-e-shabab

kya musavvir khinche tasvir-e-javani aap ki

ab-e-haivan hai kahin zahr-e-halahal hai kahin

talkh-goi aap ki shirin-zabani aap ki

khvab men ham ko na aane dete to ham jante

ki raqibon ne ye kaisi pasbani aap ki

apne marne ka nahin gham ranj hai is baat ka

aaj ungli se utarti hai nishani aap ki

hal-e-dil sunte nahin ye kah ke khush kar dete hain

phir kabhi fursat men sun lenge kahani aap ki

ham ko ye daulat kabhi milti to ham bhi jante

hogi jis ke vaste hogi javani aap ki

Leave a Comment