Poet
javani aai murad par jab umang jaati rahi bashar ki
nasib hote hi chaudhvin shab shikoh rukhsat hui qamar ki
vo shokh chitvan thi kis sitam ki ki jis ne chashmak kahin na kam ki
kisi taraf ko jo barq chamki to samjhe gardish use nazar ki
tira hi duniya men hai fasana tira hi shaidai hai zamana
tire hi gham men huiin ravana nikal ke ruhen khudai bhar ki
na asman hai na vo zamin hai makan nahin vo jahan makin hai
payambaron ka guzar nahin hai rasai hai mere nama-bar ki
khincha jo tul-e-shab-e-judai andheri madfan ki yaad aai
nigah o dil par vo yaas chhai umiid jaati rahi sahar ki
jo ishq-bazon ko azmaya laga ke chhuriyan ye qahr dhaya
yahan yahan tak lahu bahaya ki naubat aai kamar kamar ki
gire jo kuchh surkh gul zamin par kaha ye bulbul ne khaak uda kar
hua hai vaada mira barabar ye suraten hain mire jigar ki
maqam-e-ibrat hai aah ai dil khuda hi ki hai panah ai dil
nahin hai kuchh zad-e-rah ai dil adam se takid hai safar ki
ye ham ne kaisa safar kiya hai musafiron ko rula diya hai
ajal ne aghosh men liya hai khabar bhi ham ko nahin safar ki
vo jald ya-rab inhin ko taake laga de do tiir in par aa ke
ye donon rah jaaen phadphada ke main dekhun lashen dil o jigar ki
kisi ka maashuq chhutta hai sahar ka vaqt us ko lutta hai
koi ye siine ko kutta hai nahin hai avaz ye gajar ki
khicha hai zartar shamiyana gulon se aati hai bu shahana
dikha ke qudrat ka karkhana lahad ne hasrat bhula di ghar ki
ghashi ka aalam vo zor par hai mizaj-e-sehhat se be-khabar hai
dava ka ghaflat-zada asar hai khabar dava ko nahin asar ki
shabab ne khud-numa banaya ye naz-e-khushrui ne jataya
haya men jis vaqt farq aaya to un ke mukhde se zulf sarki
hua huun chaurang tegh-e-hasrat ki dafn ki hai miri ye surat
kisi taraf ko hai dil ki turbat kahin hai turbat mire jigar ki
jo us ne zid ki to aafat aai duhai dene lagi khudai
qayamat us bevafa ne dhaai idhar ki duniya ‘sharaf’ udhar ki
Leave a Reply