dil-o-nigah ki hairat main rah gae hain ham
khumar-e-khvab ki lazzat men rah gae hain ham
chura ke le gai duniya-e-pur-fareb us ko
aur apni saada tabiat men rah gae hain ham
hamen to khinch raha tha safar tiri janib
bas is jahan ki rivayat men rah gae hain ham
vo dekhta hai ki jaise na ham ko dekha ho
is aaine ki shararat men rah gae hain ham
hamen talash raha tha visal ka lamha
kisi ke hijr ki saaat men rah gae hain ham
hava ke saath kahan tak gulab ja sakte
bikhar ke rah-e-mohabbat men rah gae hain ham
vo apne khvab ke hamrah ja chuka hai naaz
akele apni haqiqat men rah gae hain ham
Leave a Reply