Shamim Abbas
umr guzar jaati hai qisse rah jaate hain
pichhli rut ke bichhḌe sathi yaad aate hain
logon ne batlaya hai ham ab aksar
baten karte karte kahin kho jaate hain
koi aise vaqt men ham se bichhḌa hai
shaam Dhale jab panchhi ghar lauT aate hain
apni hi avaz suna.i deti hai
varna to sannaTe hi sannaTe hain
dil ka ek Thikana hai par apna kya
shaam jahan hoti hai vahin paḌ jaate hain
kuchh din hasb-e-mansha bhi ji lene de
dekh tiri ThuDDi men haath lagate hain
Leave a Reply