Suleman Khumar
vo sar se paanv talak chahaton men Duuba tha
vo shaḳhs kya tha mohabbat ka isti.ara tha
na chand tha na sitara na phuul tha na dhanak
vo phir bhi husn ki duniya men ik izafa tha
mujhe pata hi nahin kab vo lafz-e-kun ban kar
mire vajud ke divar-o-dar men gunja tha
ajiib baat hai dekha na tha kisi ne use
ajiib baat hai ghar ghar usi ka charcha tha
kisi se koi gharaz thi na koi aas us ko
vo saari bhiiḌ se kaT kar akela rahta tha
samundaron se thi gahra.i us ki sochon men
vo apni zaat men ik ka.enat jiita tha
‘ḳhumar’ naam ke sha.ir se mil chuka huun main
udasiyon ke ghane jangalon men rahta tha
Leave a Reply