Jafar Raza
va.ada-e-ulfat-o-paiman-e-vafa se tauba
tajraba kahta hai us husn-e-ada se tauba
raat tarik hai bechaini baḌhi jaati hai
jis ka ulTa ho asar aisi dua se tauba
apna ghar ban gaya maqtal magar ham ahl-e-yaqin
nahin karte hain gham-e-hosh-ruba se tauba
un ki fasta.i tabi.at men hai qatl-o-gharat
kyuun karenge vo bhala zulm-o-jafa se tauba
bijli chamke to bahane se lipaT jaate hain
phir vo kahte hain baḌi sharm-o-haya se tauba
chashm-e-saqi ki qasam tha ye bahana varna
kahin karte hain mai-o-jam ke pyase tauba
us ne to chiir diya ahl-e-chaman ke dil ko
ab ke bal khaa.i hui bad-e-saba se tauba
Leave a Reply