Anand Narayan Mulla
kaam ishq-e-be-saval aa hi gaya
ḳhud-ba-ḳhud us ko ḳhayal aa hi gaya
tu ne pheri laakh narmi se nazar
dil ke a.ine men baal aa hi gaya
do miri gustaḳh nazron ko saza
phir vo na-gufta saval aa hi gaya
zindagi se laḌ na paaya josh-e-dil
rafta rafta e’tidal aa hi gaya
husn ki ḳhalvat men darrata hua
ishq ki dekho majal aa hi gaya
gham bhi hai ik parda-e-iz.har-e-shauq
chhup ke aansu men saval aa hi gaya
vo ufuq par aa gaya mehr-e-shabab
zindagi ka mah-o-sal aa hi gaya
be-ḳhudi men kah chala tha raz-e-dil
vo to kahiye kuchh ḳhayal aa hi gaya
ham na kar paa.e ḳhata buzdil zamir
le ke tasvir-e-ma.al aa hi gaya
ibtida-e-ishq ko samjhe the khel
marne jiine ka saval aa hi gaya
laakh chaha ham na len gham ka asar
ruḳh pe ik rang-e-malal aa hi gaya
bach ke jaoge kahan ‘mulla’ koi
haath men le kar gulal aa hi gaya
Leave a Reply