Poet
raat din chain ham ai rashk-e-qamar rakhte hain
shaam avadh ki to banaras ki sahar rakhte hain
bhanp hi lenge ishara sar-e-mahfil jo kiya
tadne vaale qayamat ki nazar rakhte hain
dhundh leta main agar aur kisi ja hote
kya kahun aap dil-e-ghair men ghar rakhte hain
ashk qaabu men nahin raaz chhupaun kyunkar
dushmani mujh se mire dida-e-tar rakhte hain
kaise be-rahm hain sayyad ilahi tauba
mausam-e-gul men mujhe kaat ke par rakhte hain
kaun hain ham se siva naaz uthane vaale
samne aaen jo dil aur jigar rakhte hain
dil to kya chiiz hai patthar ho to paani ho jaae
mere naale abhi itna to asar rakhte hain
chaar din ke liye duniya men ladai kaisi
vo bhi kya log hain aapas men sharar rakhte hain
hal-e-dil yaar ko mahfil men sunaun kyuun kar
muddai kaan udhar aur idhar rakhte hain
jalva-e-yar kisi ko nazar aata kab hai
dekhte hain vahi us ko jo nazar rakhte hain
ashiqon par hai dikhane ko itaab ai ‘jauhar’
dil men mahbub inayat ki nazar rakhte hain
Leave a Reply