Poet
kaaT kar jo raah ka buḌha shajar le ja.ega
saath apne dhuup ka lamba safar le ja.ega
ek sahra be yaqini ka hai ta-hadd-e-nazar
qafila-salar dekhen ab kidhar le ja.ega
apne apne hi gharon ki fikr gar karte rahe
dekhna tufan ye saara nagar le ja.ega
be-gharon ki fikr karne ki zarurat hi nahin
ek din koi farishta un ko ghar le ja.ega
kauḌiyon ke mol bik ja.ega ḳhud us ka vajud
koi jab bazar men apna hunar le ja.ega
jis ke dil men koi ḳhvahish koi arman hi nahin
saath apne be-baha zad-e-safar le ja.ega
ye khulega mujh pe aḳhir meri manzil hai kahan
jab junun ‘tasir’ mujh ko dar-ba-dar le ja.ega
Leave a Reply