afzal-naved

Jang Se Jangal Bana Jangal Se Main Nikla Nahin

jang se jangal bana jangal se main nikla nahin

ho gaya ojhal magar ojhal se main nikla nahin

daavat-e-uftad rakkhi chhal se main nikla nahin

nikle bhi kas-bal magar kas-bal se main nikla nahin

dekhte rahna tira mas.hur chhat par kar gaya

is qadar barish hui jal-thal se main nikla nahin

jaise tu hi to ho meri niind se lipta hua

jaise tere khvab ke makhmal se main nikla nahin

dekhne valon ko shahr-e-khvab sa dikhta huun main

jaise tere surmai badal se main nikla nahin

dekh suraj aa gaya sar par mujhe avaz de

phuul sa ab tak tiri konpal se main nikla nahin

shab jo aiman raag men Duubi sahar thi bhairavi

tevari chadhti rahi komal se main nikla nahin

tera pallu ek jhatke se gaya go haath se

aanch lipti hai ki juun anchal se main nikla nahin

apne markaz ki mahak charon taraf bikhrai hai

phadphada kar bhi tire sandal se main nikla nahin

taba ki pechidgi shayad miri pahchan ho

yuun na ho ho mustaqil jis bal se main nikla nahin

naam likkha tha mira main ne to apnana hi tha

ek lamhe ke liye bhi pul se main nikla nahin

yuun laga jaise kabhi main dahr ka hissa na tha

baat itni hai ki bahar kal se main nikla nahin

hausle jaise Dubo Daale hain is pardes ne

richh nikla naddi se kambal se main nikla nahin

main ne koi aatma an-chahi aane hi na di

kaise kah duun apni hi daldal se main nikla nahin

is ke hote ek shab raushan hua jal par ‘naved’

chal diya vo to kabhi ka jal se main nikla nahin

More Poems

Leave a Comment