e’tibar-e-nigah-e-yar ne dam toḌ diya
aaj ik hijr ke bimar ne dam toḌ diya
ziist ke qafila-e-salar ne dam toḌ diya
rah-e-ulfat men dil-e-zar ne dam toḌ diya
hai shifayab mariz-e-gham-e-hasti ai dost
zindagi thak ga.i azar ne dam toḌ diya
kya kiya aap ne chehra se haTa kar parda
daf.atan hasrat-e-didar ne dam toḌ diya
kya tire saghar-e-dil ki vo khanak thi saaqi
jis ki avaz pe mai-ḳhvar ne dam toḌ diya
manzil-e-azmat-e-ulfat ka pata pa na sake
aql ki taqat-e-raftar ne dam toḌ diya
aap ye aḳhiri paigham-e-masarrat sun len
ki ‘hayat’-e-jigar-afgar ne dam toḌ diya
Leave a Reply