tumhin batao pukara hai baar baar kise
aziiz kahte hain gham-ha-e-rozgar kise
sukut-e-raz kaho ya sukut-e-majburi
magar labon ki jasarat thi nagavar kise
ḳhizan men kis ne baharon ki dilkashi bhar di
dua.en deta hai daman ka taar taar kise
kahan vo daagh ki dil ka guman kare koi
samjhiye ahd-e-tamanna ki yadgar kise
nasim-e-sub.h ka ghunchon ko intizar sahi
hava-e-dasht huun main mera intizar kise
shaguftagi ka ishara hai phuul barsenge
na jaane aaj navaze-gi shaḳh-e-dar kise
jarahaton ke ḳhazane luTa diye ‘taban’
kiya hai raah ke kanTon ne itna pyaar kise
Leave a Reply