ye sarabon ki shararat bhi na ho to kya ho
aankh men hairat o vahshat bhi na ho to kya ho
ham ki us hijr ke sahra men paḌe hain kab se
ḳhema-e-ḳhvab-e-rafaqat bhi na ho to kya ho
shukr kar hujra-e-tanha.i men baiThe hue shaḳhs
ḳhud se milne ki ye mohlat bhi na ho to kya ho
main vo mahrum-e-zamana ki kabhi sochta huun
saans lene ki suhulat bhi na ho to kya ho
sochta huun main sar-e-dasht uḌata hua dhuul
teri yadon ki inayat bhi na ho to kya ho
Leave a Reply