Mahtab Haider Naqvi
mahv-e-nazzara-e-hairat hai hava pahli baar
mujh pe darvaza-e-mahtab khula pahli baar
hijr ki shab se bahut duur sar-e-matla-e-shauq
ab ke tanha.i men vo mujh se mila pahli baar
ab na ehsan karen mujh pe ye kaali raten
is andhere men jala koi diya pahli baar
ab dhanak-rang bahut saaf nazar aate hain
apne a.ine men aa.i hai jila pahli baar
ik haqiqat ne kiya ḳhvab sa jaadu mujh par
aur main der talak sota raha pahli baar
aur phir dasht-e-junun mujh ko bahut yaad aaya
chak-e-daman jo abhi main ne siya pahli baar
Leave a Reply