ret ban ban ke bikharne ki tamanna.i hai
zindagi dard ke sahra men nikal aa.i hai
vo har ik bazm men tanha hi nazar aata hai
zauq-e-tanha.i nahin ḳhubi-e-yakta.i hai
kashtiyan gharq hui hongi na jaane kitni
un ki ankhon ke samundar men vo gahra.i hai
jis se aage hai faqat duur talak gard-o-ghubar
justuju ab hamen is moḌ pe le aa.i hai
din to chehron ke alavon men jhulaste guzra
yaad phir kis ki mujhe shaam ko ghar laa.i hai
Leave a Reply