jaisa huun jis haal men huun achchha huun main
tum ne zinda samjha to zinda huun main
ik avaz ke aate hi mar ja.unga
ik avaz ke sunne ko zinda huun main
khule hue darvaze dastak bhuul chuke
indar aa jaao pahchan chuka huun main
aur koi pahchan miri banti hi nahin
jante hain sab log ki bas tera huun main
jaane kis ko raazi karna hai mujh ko
jaane kis ki ḳhatir naach raha huun main
ab to ye bhi yaad nahin ki mohabbat men
kab se tere paas huun aur kitna huun main
Leave a Reply