Iqbal Khawar
kabhi utren agar poshak ke rang
falak dekhega meri ḳhaak ke rang
baḌi mushkil men hai ab ye zamin-zad
juda kar ḳhaak se aflak ke rang
kahin dekho izafi kuchh nahin hai
bahut phenke hain us ne taak ke rang
kahani hai koi dariya men zinda
lab-e-dariya ajab hain ḳhaak ke rang
ye qissa hi agar hai gumrahi ka
to kya chamken yahan idrak ke rang
falak ne faisla kuchh kar liya hai
ki maddham paḌ rahe hain ḳhaak ke rang
vahi hai haal mere dil ka ‘ḳhavar’
vahi hai dida-e-nam-nak ke rang
Leave a Reply