khumar-barabankavi

Wo Hamein Jis Qadar Aazmate Rahe

vo hamen jis qadar azmate rahe

apni hi mushkilon ko badhate rahe

vo akele men bhi jo lajate rahe

ho na ho un ko ham yaad aate rahe

yaad karne pe bhi dost aae na yaad

doston ke karam yaad aate rahe

ankhen sukhi hui naddiyan ban gaiin

aur tufan ba-dastur aate rahe

pyaar se un ka inkar bar-haq magar

lab ye kyuun der tak thartharate rahe

thiin kamanen to hathon men aghyar ke

tiir apnon ki janib se aate rahe

kar liya sab ne ham se kinara magar

ek naseh gharib aate jaate rahe

mai-kade se nikal kar janab-e-‘khumar’

kaaba o dair men khaak udate rahe

More Poems

Leave a Comment