Salam Machhli Shahri
phulon ke des chand sitaron ke shahr men
barbad ho raha huun nigaron ke shahr men
mauj-e-saman men zahr hai bad-e-saba men aag
dam ghuT raha hai yasmin-zaron ke shahr men
aansu huun hans raha huun shagufon ke darmiyan
shabnam huun jal raha huun shararon ke shahr men
vo main huun jis ne shola-e-saghar uchhal kar
ki hai ḳhizan ki baat baharon ke shahr men
ye qil.a aur ye masjid-e-shah-e-jahan ka auj
kis darja sar-nigun huun manaron ke shahr men
ai meri fitrat-e-tarab-agin ḳhata-muaf
sharminda huun main zulm ke maron ke shahr men
bas main banunga ḳhusrav-e-mahtab ai ‘salam’
socha hai ye dhuen ke ghubaron ke shahr men
Leave a Reply