aaj se pahle tire maston ki ye khvari na thi
mai badi ifrat se thi phir bhi sarshari na thi
ek ham qadron ki pamali se rahte the malul
shukr hai yaron ko aisi koi bimari na thi
zehn ki parvaz ho ya shauq ki ramish-gari
koi azadi na thi jis men giraftari na thi
josh tha hangama tha mahfil men teri kya na tha
ik faqat adab-e-mahfil ki nigah-dari na thi
un ki mahfil men nazar aae sabhi shoala-ba-kaf
apne daman men magar koi bhi chingari na thi
kal isi basti men kuchh ahl-e-vafa hote to the
is qadar ahl-e-havas ki garm-bazari na thi
husn kafir tha ada qatil thi baten sehr thiin
aur to sab kuchh tha lekin rasm-e-dildari na thi
Leave a Reply