Use Kya Raat Din Jo Talib-E-Didar Phirte Hain

use kyā raat din jo tālib-e-dīdār phirte haiñ

ġharaz hai to ġharaz ke vāste sau baar phirte haiñ

idhar dekho bhalā ham ko zamāna kyā nahīñ kahtā

to kyā har ek se karte hue takrār phirte haiñ

jo ab vahshat nahīñ bhī hai to apnī chaal kyuuñ chhoḌeñ

jidhar jī chāhe din-bhar rāt-bhar be-kār phirte haiñ

tirī ḳhātir mohabbat ho ga.ī hai dil kī vahshat se

hameñ āvāra-pan par aa gayā hai pyaar phirte haiñ

taḌapne lūTne kī aaj un tak bhī ḳhabar pahuñchī

mujhe badnām karne ko mire ġham-ḳhvār phirte haiñ

use ham mānte haiñ to zamāne-bhar se achchhā hai

magar achchhe bhī apne qaul se ai yaar phirte haiñ

samajhte haiñ samajhne vaale us ko bhī riyā-kārī

galī-kūchoñ meñ kyuuñ tere sitam-bardār phirte haiñ

tumheñ afsos kyuuñ hai āshiqoñ kī kūcha-gardī par

phirātā hai muqaddar ye ḳhudā.ī ḳhaar phirte haiñ

kahīñ aisā na ho ik roz tum bhī ham se phir jaao

yahāñ pahle hī apnī jaan se bezār phirte haiñ

vo dil kī aarzū ab hai na us kī justujū ab hai

hamāre paañv meñ chakkar hai ham be-kār phirte haiñ

kisī kāfir kā ghar thā yā nahīñ ma.alūm jannat thī

abhī tak merī āñkhoñ meñ dar-o-dīvār phirte haiñ

zamāne se nirālā hai chalan in husn vāloñ kā

laqab to qātil-e-ālam hai be-talvār phirte haiñ

safī’ ko tum ne to koī baḌā pahuñchā huā samjhā

ajī rahne bhī do aise bahut makkār phirte haiñ

Leave a Comment