Fana Nizami Kanpuri
chehra-e-sub.h nazar aaya ruḳh-e-sham ke baad
sab ko pahchan liya gardish-e-ayyam ke baad
mil ga.i rah-e-yaqin manzil-e-auham ke baad
jalve hi jalve nazar aa.e dar-o-bam ke baad
chahiye ahl-e-mohabbat ko ki divana banen
koi ilzam na aa.ega is ilzam ke baad
imtehan-e-talb-e-ḳham liya saaqi ne
jam-e-lab-rez diya durd-e-tah-e-jam ke baad
haa.e kya chiiz hai ye lutf-e-shikasta-pa.i
hausle aur baḌhe koshish-e-nakam ke baad
zindagi naam hai ik johd-e-musalsal ka ‘fana’
rah-rau aur bhi thak jaata hai aram ke baad
Leave a Reply