ek manzar men ka.i baar use dekh ke dekh
dekhna hai to lagatar use dekh ke dekh
koi suraj se mila paata hai kab tak ankhen
phir bhi ik baar lagatar use dekh ke dekh
ye khuli aankh ka manzar hi nahin hai miri jaan
band ankhon se bhi ik baar use dekh ke dekh
barf ankhon men liye duur khaḌe shaḳhs ki ḳhair
kaise jalne lage ruḳhsar use dekh ke dekh
koi dalan se jugnu na idhar aa nikle
ḳhvab ho jaa.en na bedar use dekh ke dekh
dekhte dekhte kya kuchh nazar aane lag jaa.e
a.ina-ḳhane ke us paar use dekh ke dekh
hai yaqin chaal sitaron ki badal ja.egi
ek din sub.h ka aḳhbar use dekh ke dekh
lab hain jis naam ki tasbih use sun ke tu sun
aankh jis ki hai talabgar use dekh ke dekh
gard tanha.i ki ab chhoḌ uḌana ‘sima’
jhenpte hain dar-o-divar use dekh ke dekh
Leave a Reply