Jo Ho Sake to Mayassar Hamein Tamam Raho

jo ho sake to mayassar hameñ tamām raho

qayām dil meñ karo aur yahīñ mudām raho

ye koī baat ki is ke hue kabhī us ke

hamāre ho to sarāsar hamāre naam raho

kabhī to aao hamārī rasā.ī kī had meñ

kabhī kabhī to hamāre liye bhī aam raho

ba.iid kuchh bhī nahīñ hai hamārī baat suno

tanāb-e-ḳhema-e-imkāñ zarā sā thaam raho

nahīñ hai chaah hameñ manziloñ kī koī ‘ufuq’

safar meñ saath hamāre har ek gaam raho

Leave a Comment