jism ke is khanDar ki tanha.i
aur ye raat bhar ki tanha.i
ek tasvir bhi nahin ghar men
uf ye divar-o-dar ki tanha.i
koi aahaT na koi saaya hai
har qadam hai safar ki tanha.i
ek aalam ko hai sameTe hue
meri fikr-e-nazar ki tanha.i
meri sanson men bas ga.i jaise
jan-o-dil ki jigar ki tanha.i
kitni bezar hai ye mausam se
samar-avar shajar ki tanha.i
dekhta hai nikal ke suraj roz
ye mire bam-o-dar ki tanha.i
raat din rote hai dar-o-divar
kha ga.i mujh ko ghar ki tanha.i
zindagi ke safar men ai ‘arpit’
dekh li dar-ba-dar ki tanha.i
Leave a Reply