Shaad Aarfi
jab tak ham hain mumkin hi nahin na-mahram mahram ho jaa.en
aata hai unhen ghussa aa.e hote hain vo barham ho jaa.en
duniya-e-masarrat ke lamhe ab is se kya kam ho jaa.en
honTon par hansi aane vaali ho ankhen pur-nam ho jaa.en
ham us ke aankh se ojhal hone ka matlab kya lete hain
vo aankh se ojhal ho to nazare darham-barham ho jaa.en
halat ko har har mauqa.a par ik bhes badalna lazim hai
kanTon men daman ban jaa.en phulon par shabnam ho jaa.en
us kafir aisi mastana raftar kahan se la.enge
ash.ar mujassam ho jaa.en afkar munazzam ho jaa.en
un ki rahmat se duur nahin lekin is par majbur nahin
ighmaz karen har laghzish par sajdon par barham ho jaa.en
ahbab ko aise gulshan men fitne baune se kya hasil
jab do dil mohkam ho jaa.en jab va.ade paiham ho jaa.en
us vaqt bhi zohd-o-taqva par qaa.em rah ja.un tab kahna
jis vaqt mujhe mai-noshi ke asbab faraham ho jaa.en
samjho ki javani ḳhvab men hai ruḳh banhon ki mehrab men hai
jab taare dhime paḌ jaa.en jab sham.en maddham ho jaa.en
un ḳhvab-aluda ankhon ki tarkib samajh men aa jaa.e
ai ‘shad’ agar paimanon men mai-ḳhane mudgham ho jaa.en
Leave a Reply