Shohrat Bukhari
vo paas aa.e aas bane aur palaT ga.e
kitne hi parde ankhon ke aage se haT ga.e
har baagh men bahar hui ḳhema-zan magar
daman ke saath saath yahan dil bhi phaT ga.e
gumrahiyon ka lapka kuchh aisa paḌa ki ham
manzil qarib aa.i to rahbar se kaT ga.e
dil de ke is tarah se tabi.at sambhal ga.i
goya tamam umr ke jhagḌe nipaT ga.e
barson ke pyase dasht-navardon se puchhiye
un badalon ka pyaar jo ghirte hi chhaT ga.e
bas men rahen na jab gham-e-dauran ki vus.aten
ham log apne gosha-e-dil men simaT ga.e
‘shohrat’ unhen bhulane ki koshish jo ki kabhi
daman-e-dil se sainkaḌon fitne lipaT ga.e
Leave a Reply