hazaron gham hain is manzil men manzil dekhne vaale
kaleja thaam le apna mira dil dekhne vaale
ye dil valon ko ta.alim-e-sujud pa-e-janan hai
sar-e-har-mauj ko barpa-e-sahil dekhne vaale
har ik zarre men poshida hai ik tughyan-e-mad.hoshi
sambhal kar dekhna paimana-e-dil dekhne vaale
miTata ja raha huun naqsh-e-pa sahra-navardi men
kahan DhunDenge mujh ko meri manzil dekhne vaale
tere dil men hazaron mahfilen jalvon ki pinhan hain
falak par anjum-e-taban ki mahfil dekhne vaale
fishar-e-zabt se laila kahin majnun na ho jaa.e
na dekh ab su-e-mahmil su-e-mahmil dekhne vaale
kisi ka aks huun ‘ehsan’ mura.at-e-haqiqat men
mujhe samjhenge kya tasvir-e-batil dekhne vaale
Leave a Reply