Shaghil Adeeb
kis ne kaha minnat-kash-e-mai-ḳhana hua huun
apna hi lahu piita huun divana hua huun
har raat tilismat ke qisson ka huun kirdar
har roz alif-lailvi afsana hua huun
apnon ke dilon men huun huun auron ki zaban par
duniya ke liye main kahan begana hua huun
Thahra huun gada ik nigah-e-vaqt men lekin
apne liye to azmat-e-shahana hua huun
vo hain ki sitam toḌte hain saare mujhi par
aur main huun ki bas sabr ka paimana hua huun
vo maan jo sarapa thiin mohabbat na rahin ab
haan main usi maan ke liye divana hua huun
barson se shanasa rahe jin ke liye ‘shaghil’
kyon aaj main un ke liye an-jana hua huun
Leave a Reply