har qadam par na.i divar uThane vaale
baḌe aa.e mujhe tahzib sikhane vaale
tu hi har rind ka qibla ho zaruri to nahin
shahr men kam nahin ankhon se pilane vaale
koi is ḳhvab ki ta.abir bata sakta hai
roz aate hain mujhe ḳhvab Darane vaale
jis ko dekho hai vahi paikar-e-alam yahan
kho ga.e jaane kahan hansne hansane vaale
vaqt ke aage sipar Daale hue kaun hain ye
ham to the vaqt ki buniyad hilane vaale
saat pardon men tujhe DhunDh hi lenge ‘raḳhshan’
chain se rahne kahan denge zamane vaale
Leave a Reply