dil chura le ga.i duzdida-nazar dekh liya
ham na kahte the ki us chor ne ghar dekh liya
banda-parvar gham-e-furqat ka asar dekh liya
dagh-e-dil dekh liya dagh-e-jigar dekh liya
qad bhi kam umr bhi kam mashq-e-sitam aur bhi kam
kar chuke qatl mujhe ja.iye ghar dekh liya
shikve ke saath lagavaT bhi chali jaati hai
jab kiya kuchh to kanakhiyon se idhar dekh liya
dad-ḳhvahon pe na.i hashr men aafat aa.i
saf ki saf loT ga.i us ne jidhar dekh liya
qatl-e-ushshaq pe lo aur uThao ḳhanjar
jhuk ga.i bar-e-nazakat se kamar dekh liya
na chhuTa tum se ye mai-ḳhane ka rasta ‘beḳhud’
munh chhupa.e hue jaate ho kidhar dekh liya
Leave a Reply