uljhe kanton se ki khele gul-e-tar se pahle
fikr ye hai ki saba aae kidhar se pahle
jam-o-paimana-o-saqi ka guman tha lekin
dida-e-tar hi tha yaan dida-e-tar se pahle
abr-e-naisan ki na barakat hai na faizan-e-bahar
qatre gum ho gae taamir-e-guhar se pahle
jam gaya dil men lahu suukh gae ankhon men ashk
tham gaya dard-e-jigar rang-e-sahar se pahle
qafile aae to the naaron ke parcham le kar
sar-nigun ho gai har aah asar se pahle
khun-e-sar bah gaya maut aa gai divanon ko
barish-e-sang se tufan-e-sharar se pahle
surkhi-e-khun-e-tamanna ki mahak aati hai
dil koi tuuta hai shayad gul-e-tar se pahle
maqtal-e-shauq ke adab nirale hain bahut
dil bhi qatil ko diya karte hain sar se pahle
Leave a Reply