us ne socha bhi nahin tha kabhi aisa hoga
dil hi israr karega ki bichhaḌna hoga
kashtiyan ret pe baiThi hain umiden bandhe
aisa lagta hai ye sahra kabhi dariya hoga
ik udasi miri dahliz pe baiThi hogi
ek jugnu mire kamre men bhaTakta hoga
tum ne vo zaḳhm diya hai miri tanha.i ko
jo na asuda-e-gham hoga na achchha hoga
chand jis raat na nikla to guman guzra hai
vo yaqinan tire angan men chamakta hoga
apna sar kaaT ke neze pe uTha.e rakkha
sirf ye zid ki mira sar hai to uncha hoga
Leave a Reply