luT rahi hai daulat-e-didar qiasar-bagh men
misl-e-gul sab ho ga.e zardar qaisar-bagh men
dekhte hain yaar ka paḌhta hai kalima kaun kaun
jam.a hain sab kafir-o-dinda qiasar-bagh men
ham se aankh us ne laḌa.i tevri badli ghair ne
chalte chalte rah ga.i talvar qiasar-bagh men
us kaman-e-abru ne kiin dil par nazar-andaziyan
ham pe tiron ki hui bauchhar qiasar-bagh men
gaate hain murghan-e-gulshan peng deti hai sada
jabki jhula jhulta hai yaar qiasar-bagh men
be-ḳhudi chha.i hui hai ye sharab-e-aish ki
mast do bahar paḌe hain chaar qiasar-bagh men
yaan hava men hai dam-e-isa ka aalam kya ajab
paa.e sehat nargis-e-bimar qiasar-bagh men
main to kya hote hain gul bhi kushta-e-tegh-e-ḳhiram
banki tirchhi chalte ho raftar qaisar-bagh men
jalva-afgan nuur ke hain phuul phal tuuba ki tarf
ḳhuld se mangva.e hain ashjar qiasar-bagh men
ab to ai rashk-e-chaman surat dikhana chahiye
nala-kash hai andalib-e-zar qiasar-bagh men
vo na the pahlu men to us ne bhi ki pahlu-tahi
mujh se dil men dil se tha bezar qiasar-bagh men
daur-e-ishrat hai ye zoron par hain mai-kash kya ajab
mohtasib ki chhin len dastar qiasar-bagh men
aamad aamad hai salami ko hamare shaah ki
hain javanan-e-chaman tayyar qiasar-bagh men
mohtasib ke haath se tang is qadar hain ai ‘qalaq’
aa.e hain nalish ko sab mai-ḳhvar qiasar-bagh men
Leave a Reply