Charagh Barelvi
us chashm-e-ashk-e-bar ki zid ra.egan to ho
meri fasil-e-sabr ka koi nishan to ho
ye kya ki ek samt hi jaati hai zindagi
kuchh karobar-e-shorish-e-sud-o-ziyan to ho
jannat si koi chiiz ho gham ka muavza
be-shak sukun yahan na ho lekin vahan to ho
jabran na kuchh milega to israr kijiye
be-dast-o-pa huun chhoḌiye munh men zaban to ho
le ja.iye badan ko bhi aḳhir kahan pe aap
koi zamin to ho kahin ik asman to ho
aa.e yaqin kyon hamen jalta tha ik badan
be-shak na aag ho kahin lekin dhuan to ho
Leave a Reply